A xuntanza convocada polo Concello serviu como un espazo de diálogo no que se acordou poder abrir o comercio de proximidade a noite do sábado 6 de setembro, coincidindo coa proba ciclista A Nocturna e o Negrita Music Festival, ademais do venres 19 cando terá lugar a “Noite Aberta”
O Porriño, 28 de agosto de 2025.- A xuntanza convocada polo Concello do Porriño co tecido comercial do municipio para tratar temas como unha próxima shopping night, contou cunha moi boa acollida e participación por parte dos comerciantes locais, que responderon positivamente á proposta de celebrar unha nova edición coincidindo coas Festas do Cristo. Con todo, para diferenciala da realizada na Porriño Fashion Weekend, adoptará a denominación de “Noite Aberta” pero o fundamento é o mesmo, abrir as tendas en horario nocturno promovendo así as vendas nun ambiente festivo no que non faltará a música e outras actividades lúdicas e promocionais para todos os públicos.
Durante o encontro, o alcalde Alejandro Lorenzo, acompañado das concelleiras de Comercio, Rosa Isabel Alonso, e Mercado, Antía Carrera, presentou a iniciativa, que se celebrará o venres 19 de setembro e que busca seguir dinamizando o comercio local e atraer visitantes á vila, reforzando así o vínculo entre o Concello e os comerciantes.
A xuntanza serviu tamén como un espazo aberto de diálogo, no que os comerciantes puideron expoñer as súas ideas e suxestións. Entre as propostas recollidas, destacou o interese en aproveitar tamén a noite do vindeiro sábado 6 de setembro, data na que O Porriño acollerá diferentes actividades culturais e festivas, como son a proba ciclista A Nocturna e o Negrita Music Festival, para manter os comercios abertos en horario especial, aproveitando o fluxo de xente que se agarda na vila.
“Esta nova iniciativa reflicte o compromiso do Concello co comercio local, un sector fundamental para a vida económica e social do Porriño co que xa colaboramos ao longo de todo o ano a través dun convenio asinado con Acipor. A excelente acollida por parte dos comerciantes demostra que, cando traballamos xuntos, podemos crear eventos que dinamizan a vila, atraen visitantes e fortalecen o sentimento de pertenza. A nosa intención é seguir escoitando as súas propostas e acompañalos en todas aquelas accións que contribúan ao seu crecemento e á proxección do Porriño como referente comercial e cultural”, explica o alcalde.
Dende o Concello agradécese a boa disposición e implicación do sector, reafirmando o compromiso de seguir traballando da man dos comerciantes en accións que contribúan ao seu crecemento e á proxección da vila.
Premios do comercio galego
Aproveitando a reunión as concelleiras trasladáronlle aos comerciantes información sobre unha nova edición do Premios do Comercio Galego, con diferentes categorías por valor de entre 3.000 e 5.000 euros. Explicóuselle o procedemento de solicitude e os criterios de valoración, indicándolles que poden acudir ao Concello para recibir asesoramento ou axuda na tramitación.
